Casa J+C

Trátase dun proxecto de reforma integral dunha edificación existente nunha zona residencial moi consolidada e cun abanico tipolóxico amplo onde se mesturan edificacións unifamiliares con plurifamiliares a poucos metros da costa.

O proxecto parte dunha edificación dos anos 70 onde é necesario reformala integralmente, mantendo toda a súa estrutura e a súa volumetría, eliminando engadidos e cuberta. Coa intervención resólvense os requisitos construtivos, estruturais e de habitabilidade necesarios, que no momento previo á actuación eran totalmente deficitarios. Créase ademais unha nova pel e sácaselle o maior partido á orientación e ás marabillosas vistas.

Os nosos clientes querían unha vivenda funcional, con moita luz e con toques de contemporaneidade. Esta organízase en tres niveis: planta baixa para zona de día/espazo social e instalacións, planta primeira destinada a zona de noite/dormitorios, e planta segunda onde se atopa o estudo e a gran terraza.